Rev 12 | TBO | STEP | Wekiwekilala baneina gehouna hoi yada i laugeleteya naka wawine ma a luilui kabudala ma wamahiya uyahina i towotowolo, a unuhau ubona magouhi 12.

Revelation of John 12

Wawine ma mogaya kayakayana

1 Wekiwekilala baneina gehouna hoi yada i laugeleteya naka wawine ma a luilui kabudala ma wamahiya uyahina i towotowolo, a unuhau ubona magouhi 12. 2 Ma wawinena koikoibana po i wogowogo nae ma i ototu ipa ina wigunaguna. 3 Ma wekiwekilala gehouna hoi yada i laugeleteya naka mogaya baneina kayakayana, ma unununa magouhi 7, ma donana magouhi 10, ma unuhau gegehi unununa i hounihi. 4 Ma ubona bolu tonuga po bolu emosi mimituwana giunei i wilawihi po i wihulu hopunehi hoi hipuli. Ma mogayana kayakayana wawinena u naona i towotowolo ipa apo wawinena ina igunaguna yaka tewelana ina ani. 5 Uyahinei wawinena i gunaguna po tewela olotona, tauna ipa tupo atapuna uyahina apo ina taniwaga a kadidiligei. Ega yaka tewelana Yaubada i wihaleya po i gae anani mae wasawasa uyahina. 6 Ma wawinena i lowo nae hoi balabala, po noka hotana wawine anani megowada Yaubada i inonogogeya uyahina i gagalena iteteya bolima tonuga ma tupona ^{▼▼12.6Limoinana naka iyeta magouhi 1,260.}.

7 Ega yaka hoi yada witona i geleta. Naka witonana Maikeli a tu winoyanoya mitehi ma mogaya kayakayana a tu poula mitehi ma hi gawigawiya, 8 po mogayana a bolu mitehi ega emoemotana ipa hina kadidili Maikeli a bolu uyahihi, ma mogayana a tu poula mitehi hi wiyaga hopunehi po ega hai ani mae hoi yada. 9 Ma mogayana baneina naka tauna mota odubo walihagana gowana Setani a bui Tomodulele, palouma hai taniwaga tauna tu mehipuli hai tu wikoyakoyama. Tauna a tu poula mitehi hi wihulu hopunehi hoi hipuli.

10 Geka u mulina pona gehouna gololona baneina a noonoli hoi yada ma i pa,

‘Geka hougana Yaubada a wasawasagei po Keliso a taniwagagei manini
po luyagohana he gelegeleta
babana walewalehita tu wigouhi odubona tauna uguwa po iyeta
ma i towolo po Yaubada u matana i igouhi amaka yadei hi halena hopuneya.
11 Baha dumana walewalehita yautuhi hi palihaleya
po Keliso binei hi hilahilage
naka tauhi Tomodulele mitehi hi gawiya po hi kadidili,
hai kadidili babana Sipi Natuna talana
ma hai kawamoina Sipi Natuna uyahina binei.
12 Uyahinei yada tu miyena atapumi ona kaoha.
Tamogi taumi hipuli po boga tu miyehi witai baneina uyahimi,
babana Tomodulele a uyogigeina
ma i hopu mahi uyahimi,
ma i hanapugeya a houga kuku hotana apo ina memae
yaka apega a houga ina haleya.’
13 Mehougana mogayana kayakayana i gagaleya naka amaka hi halena hopuniyai hoi hipuli ega yaka wawinena tewela olotona i guniguni i wiyagaya. 14 Ma Yaubada wawinena apape i weleya mei magisubu baneina apapena po uyahinei balabala yabayababa i lupa haleya, Yaubada i gowadi ma i gagalena iteteya bolima tonuga ma tupona ipa mota ega ina wodadani. 15 Ega yaka motana gamonei goila i huwena hopuneya po mei goila ina hopu wawinena mulinei po ipa ina alugeya. 16 Ma hipuli wawinena i haguya babana hipuli i gunahoeya ma goila atapuna i lumehaya. 17 Ega yaka mogayana kayakayana i luuyogigai ma i nae wawinena a guguni uyahihi po i wigawiyehi, tauhi naka Yaubada a baha tu wiponawogogena po Yesu binei hi ibenabenama.